«Awaza» milli syýahatçylyk zolagynda ýerleşýän «Daýanç» sagaldyş merkezinde Türkmenistanyň ylym we bilim işgärleriniň kärdeşler arkalaşyklarynyň etrap, şäher geňeşleriniň, ilkinji guramalarynyň başlyklarynyň, hasapçylarynyň, gaznaçylarynyň, derňew toparynyň agzalarynyň we geňeş agzalarynyň gatnaşmaklarynda «Ylym-bilim — ýurdumyzyň sarsmaz binýady, beýik ösüşlerimiziň egsilmez bady» atly okuw maslahaty geçirildi. Bäş gün dowam eden maslahat örän guramaçylykly geçdi. Günüň birinji ýarymynda Türkmenistanyň Zähmet kodeksine laýyklykda kärdeşler arkalaşyklarynyň ilkinji guramalarynda işleri guramak, dolandyrmak boýunça resminamalaryň ýöredilişi, hormatly Prezidentimiziň ylym-bilim syýasatyny wagyz etmekde öňde durýan wezipeler, gündelik işlerde ýüze çykýan meseleler, zähmeti goramak, tehniki howpsuzlyk çäreleriniň geçirilişi barada gürrüňler edilip, pikir alşyldy. Kärdeşler arkalaşyklarynyň ilkinji guramalarynda agzalyk tölegleriniň ýygnalyşy barada aýdylyp, maliýe resminamalaryny dogry ýöretmekde maliýe-ykdysady bölümiň hünärmeniniň maslahaty diňlenildi.

Maslahatyň dowamynda bilim işgärleri Gahryman Arkadagymyzyň, Arkadagly Gahryman Serdarymyzyň ylym-bilim ulgamyny ösdürmekde alyp barýan işlerine buýsançlaryny beýan etdiler. Gahryman Arkadagymyzyň şu ýylyň 1-nji sentýabrynda Arkadag şäheriniň Ruhyýet köşgünde Bilimler we talyp ýaşlar güni hem-de täze okuw ýylynyň başlanmagy mynasybetli geçen umumy sapagynyň täsiri, terbiýeçilik ähmiýeti, bilim ulgamynda ýetilen sepgitler, hereket edýän konsepsiýalar, sport ulgamynda halkara derejede gazanylýan üstünlikler dogrusynda täsirli söhbetler edilip, ösüp gelýän ýaş nesilleri terbiýelemekde mugallymlaryň öňünde uly borjuň durýandygy nygtaldy. Watanymyzyň aýdyň geljegi, ýagty ertiri ugrunda taýsyz tagallalary edýän Milli Liderimiziň, döwlet Baştutanymyzyň adyna alkyş sözleri aýdyldy.

Ogulmiwe Atnaýewa,
Balkanabat şäherindäki 24-nji orta mekdebiň mugallymy
"Balkan" welaýat gazeti, 09.11.2023