2023-nji ýylyň 1-nji oktýabrynda Aşgabat şäherindäki 10-njy orta mekdepde akyldar şahyrymyz Magtymguly Pyragynyň doglan gününiň 300 ýyllygyna bagyşlanyp, «Akyl paýhas ummany Magtymguly Pyragy» atly bir aýlyk edebiýat sergisi guraldy. Onda söz ussadynyň watançylyk, akyl-paýhas, edep-ekram we başga-da dürli temalarda döreden şygyrlary halypa suratkeşleriň «Magtymguly» atly portretleri bilen utgaşdyryldy. Edebiýat sergisiniň dowamynda okuwçylaryň ukyp-başarnygyny açyp görkezmek hem-de ýaşlaryň dil baýlygyny, ýatkeşligini ösdürmek üçin döredijilik bäsleşikleri guralýar.

Biz halkymyzyň belli şahsyýetlerine sarpa goýup, ýaşlarymyza görelde mekdebi bolýan Gahryman Arkadagymyza, Arkadagly Gahryman Serdarymyza köp sagbolsun aýdýarys.

Ogulgerek GYLYÇDURDYÝEWA,
Aşgabat şäherindäki 10-njy orta mekdebiň mugallymy.


www.turkmenmetbugat.gov.tm
"Watan" gazeti, 20.10.2023