Ak bugdaý etrabyndaky ýöriteleşdirilen 45-nji orta mekdepde «Altyn asyryň altyn zehinleri» atly taslama (ylmy döredijilik) bäsleşiginiň welaýat tapgyry geçirildi. Okuw dersleri boýunça geçirilmegi däbe öwrülen bäsleşigiň bu tapgyry welaýat Baş bilim müdirligi tarapyndan guraldy.

Hormatly Prezidentimiziň ýurdumyzyň bilim ulgamyny ýokary derejede kämilleşdirmek, ylymly, bilimli, giň dünýägaraýyşly, sagdyn pikirli, ýokary aň-düşünjeli, dünýäniň ösüşleri bilen aýakdaş gidip bilýän, döwrümize mynasyp nesilleri terbiýeläp ýetişdirmek ugrundaky tagallalaryndan ugur alnyp, zehinli ýaşlary ýüze çykarmak maksady bilen geçirilen bäsleşikde welaýatymyzyň umumybilim berýän mekdepleriniň 11-nji, 12-nji synp okuwçylary okuw derslerinden taýýarlan döredijilik-taslama işlerini görkezdiler.

Ynsanperwerlik-durmuş bilimleri, tebigy we takyk ugurlary boýunça geçen bäsleşigiň emin agzalary ýaşlaryň taýýarlan işlerine hem-de çykyşlaryna mynasyp baha berip, her ugur boýunça ýeňijileri kesgitlediler. Ýeňijileriň arasynda Gökdepe etrabyndaky Berdimuhamet Annaýew adyndaky ýöriteleşdirilen 27-nji orta mekdebiň, Bäherden etrabyndaky 8-nji orta mekdebiň, Tejen etrabyndaky ýöriteleşdirilen 33-nji, 35-nji orta mekdepleriň, Ak bugdaý etrabyndaky 1-nji, 16-njy, ýöriteleşdirilen 27-nji orta mekdepleriň, Sarahs etrabyndaky 1-nji, 18-nji orta mekdepleriň, Kaka etrabyndaky 17-nji orta mekdebiň, Babadaýhan etrabyndaky 23-nji orta mekdebiň okuwçylary bar.

Ogulşat ÇARYÝEWA,
Ylym we bilim işgärleriniň kärdeşler arkalaşygynyň
Ak bugdaý etrap Geňeşiniň işgäri.
"Ahal durmuşy" welaýat gazeti, 12.02.2025