Düýn Türkmenistanyň Magtymguly adyndaky Ýaşlar guramasynyň Merkezi Geňeşiniň gurnamagynda Türkmenistanyň Jemgyýetçilik guramalarynyň merkezi binasynda «Türkmenistanyň Halk Maslahatynyň taryhy çözgütleri – ýaşlar syýasatynyň täze başlangyçlary we kämil geljegi gurmagyň möhüm ýoly» atly onlaýn maslahat duşuşygy geçirildi.

Oňa TMÝG-niň Merkezi Geňeşiniň işgärleri, Aşgabat we Arkadag şäheriniň we welaýat, şäher, etrap Geňeşleriniň işgärleri, dürli kärlerde zähmet çekýän ýaşlar hem-de ýurdumyzyň ähli ýokary okuw jaýlarynyň talyplary hem-de mugallymlary öz ýokary okuw jaýlarynyň mejlisler jaýlaryndan, okuw otaglaryndan internet arkaly onlaýn gatnaşdylar.

Maslahat duşuşygynda Türkmenistanyň Mejlisiniň Ylym, bilim, medeniýet we ýaşlar syýasaty baradaky komitetiniň başlygy Bahar Seýidowa, Türkmenistanyň Magtymguly adyndaky Ýaşlar guramasynyň Merkezi Geňeşiniň başlygy Ýazpolat Keriýew, Türkmenistanyň Senagatçylar we telekeçiler partiýasynyň Arkadag şäheriniň komitetiniň başlygy Arslan Täşliýew, Türkmenistanyň Telekommunikasiýalar we informatika institutynyň mugallymy, Aşgabat şäher Halk maslahatynyň agzasy Atajan Nurýagdyýew, Türkmenistanyň Ylymlar akademiýasynyň Halkara ylmy-tehnologiýa parkynyň Nanotehnologiýalar barlaghanasynyň müdiri Halmyrat Orunbaýew, Arkadag şäheriniň Enäniň we çaganyň saglygyny goraýyş merkeziniň bölüm müdiri Mähri Jumaýewa, Harby gullukçy Kakageldi Öwezmuhammedow, Döwletmämmet Azady adyndaky Türkmen milli dünýä dilleri institutynyň magistranty Çeper Nazargylyjowa, Magtymguly adyndaky Türkmen döwlet uniwersitetiniň 3-nji ýyl talyby Akgözel Ýagmyrowa hem-de Aşgabat şäheriniň iňlis dili, himiýa we biologiýa okuw derslerini çuňlaşdyryp öwredýän 86-njy ýöriteleşdirilen orta mekdebiniň okuwçysy Aýmyrat Kakaýew dagylary täsirli çykyş etdiler.

“Pähim-paýhas ummany Magtymguly Pyragy” ýylynyň 24-nji sentýabrynda Gahryman Arkadagymyzyň başlyklyk etmeginde geçirilen Türkmenistanyň Halk Maslahatynyň mejlisinde kabul edilen çözgütler, öňe sürlen başlangyçlar, öňde goýlan wezipeler dogrusyndaky çykyşlar maslahatyň mazmunyny düzdi. Çykyş edenler Gahryman Arkadagymyzyň, Arkadagly Gahryman Serdarymyzyň döredip berýän giň mümkinçilikleri esasynda ýaşlaryň ýurdumyzda geçirilýän syýasy-jemgyýetçilik çärelerine yzygiderli gatnaşýandyklaryny, olaryň döwletimizde alnyp barylýan parahatsöýüjilikli syýasata doly düşünmekleri, durmuşa geçirilýän Döwlet maksatnamalaryna mynasyp goşant goşýan hakyky watançy ogullar, gyzlar bolup kemala gelmekleri üçin uly aladalar edilýändigini aýratyn belläp geçdiler. Çäräniň ahyrynda oňa gatnaşanlar watanymyzy ösüşiň belent sepgitlerine tarap alyp barýan, ýaşlary ýurdumyzyň güýç-kuwwatyna deňäp, olaryň kämil şahsyýetler bolup kemala gelmegi üçin ähli mümkinçilikleri döredip berýän Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň adyna alkyş sözlerini beýan etdiler.

Begmuhammet MEREDOW,
TMÝG-niň Merkezi Geňeşiniň Sanly ulgam we
maglumat howpsuzlygy bölüminiň müdiri.


yashlar.gov.tm