2024-nji ýylyň 20-31-nji iýuly aralygynda Saud Arabystany Patyşalygynyň Er-Riýad şäherinde 56-njy Halkara himiýa olimpiadasy (56th International Chemistry Olympiad, IChO-2024) geçirildi. Bu halkara bäsleşigine 87 sany döwletden jemi 387 okuwçy, şol sanda ýurdumyzdan Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň zehinli okuwçylary hem işjeň gatnaşdylar. Bäsleşige gatnaşan mekdep-internatynyň 11-nji synp okuwçysy Jumaýew Rüstem we 12-nji synp okuwçysy Atajanowa Aýgül kümüş medala, 11-nji synp okuwçysy Döwletow Diýar we 12-nji synp okuwçysy Akmyradowa Jeren bürünç medala mynasyp bolmagy başardylar.

Mekdep okuwçylarynyň bu abraýly halkara bäsleşiginde baýrakly orunlara mynasyp bolmaklary Hormatly Prezidentimiziň ýaş nesil baradaky yzygiderli aladalarynyň, hemmetaraplaýyn bilimli, intellektual we ruhy taýdan ösen, watansöýüji ýaşlary terbiýeläp ýetişdirmek meselelerine berýän hemişelik ünsüniň Pähim-paýhas ummany Magtymguly Pyragy ýylynda gazanylan nobatdaky netijeleridir.




education.gov.tm