Ylym-bilimiň ösýän häzirki döwründe daşary ýurt dillerini öwrenmek has möhümdir, sebäbi dil öwrenmäge adamyň gyzyklanmalary artýar. Fransuz dilini öwretmegiň häzirki zaman usullarynyň esasy meselesi okuw wagtynda emeli daşary ýurt diliniň gurşawyny döretmekdir. Mugallymyň işiniň netijeliligi mekdepde häzirki zaman biliminiň esaslaryny we mugallymçylyk tejribesini durmuşa geçirmäge taýýardygyna baglydyr. Fransuz dilini öwrenmek okuw materiallaryny özgertmekden başlaýar. Multimedia we kompýuter tehnologiýalaryny ulanmak häzirki zaman okuwynyň has täsirli bolýandygyny görkezýär. Çünki häzirki wagtda çagalar elektron enjamlaryndan maglumatlary has gowy kabul edýärler we özleşdirýärler. Elbetde, multimedia arkaly fransuz dili sapagy mugallymdan goşmaça hünärleri talap edýär. Şeýle-de bolsa, kompýuter çeşmeleriniň ähmiýetini inkär etmeli däl, sebäbi häzirki zaman mekdep okuwçysynyň durmuşy olar bilen ýakyndan baglanyşyklydyr.

Kompýuterleri ulanmak bilen fransuz dilini öwrenmek adaty okatmagyň usullarynyň ornuny tutmaýar. Emma, olary dolduryp, sapagy has gyzykly we öndürijilikli edip biler. Mundan başga-da, bu görnüşi utgaşykly öwrenmek mümkindir. Mysal üçin, deslapky taýýarlygy (öý işini) talap edýän «Adaty fransuz aşhanasy» temasy boýunça okuw. Sapakda okuwçylar Fransiýanyň aşpezlik däpleri barada maglumatlary paýlaşýarlar. Okuwçylar hasabat ýa-da düzme görnüşinde maglumatlary hödürläp bilerler. Bu ýagdaýda prezentasiýa wagtynda ara alnyp maslahatlaşylan tagamlaryň şekilleri multimedia tagtada görkeziler.

Kompýuter tehnologiýasyny ulanyp, fransuz dilini öwretmegiň häzirki zaman usullary okuwçylaryň özbaşdaklygyny ösdürmegi we öz-özüňi dolandyrmagy güýçlendirer. Öz ene dilinde gürleýjiler bilen aragatnaşyk (hat alyşmalar, wideokonferensiýalar we ş.m.) dil we psihologiki päsgelçilikleri kem-kemden azaldar we fransuz dilinde aragatnaşygy ösdürer.

Kompýuter tehnologiýasyny we multimediany ulanýan sapaklar innowasiýa hasaplanýar we mugallymçylyk tejribesinde goşmaça okuw we synagy talap edýär. Şeýle-de bolsa, olaryň köpüsi mugallymçylyk tejribesinde üstünlikli ulanylyp bilner.

Aýna GAÝYBOWA,
Aşgabat şäherindäki daşary ýurt dillerini
çuňlaşdyryp öwredýän ýöriteleşdirilen
4-nji orta mekdebiň mugallymy.
"Mugallymlar gazeti" gazeti, 10.04.2024