Gynansak-da, käbirimize kompýuteriň başynda oturyp kino görmek ýa-da oýun oýnamak, uzakly gün diýen ýaly el telefonlaryny ulanmak endige öwrüldi. El telefonyny, kompýuteri aşa köp ulanmak, gözüň ýadawlygyndan, gyzarmagyndan başga-da, ýakyndan görmezlige eltip bilýär. Şonuň üçin hünärmenler tarapyndan bellenilen göz maşklaryny çagalardan başlap, uly ýaşlylara çenli ýerine ýetirmeklik maslahat berilýär.

Tehnologiýalar işi ýeňletse-de, kähalatda göze agram berip, ýadadyp bilýär. Gözüňiziň görüjiligini goramak hem-de ýadawlygyny aýyrmak üçin maşklary size hödürleýäris. Şeýle maşklary günüň dowamynda iş wagtynyň aralygynda 3 — 5 minut ýerine ýetirip bilersiňiz.

► Göz maşklary äýneksiz ýa-da göz linzalary bolmazdan, ýerine ýetirilmeli. Gowy netije gazanmak üçin ähli maşklar rahat ýerine ýetirilmelidir. Gözleriň we ýüzüň myşsalary mümkin boldugyça rahatlanmalydyr. Saýlanan maşklar her gün yzygiderlilikde ýerine ýetirilmeli.

► Ilki bilen, gözüňizi gatyrak ýumup, 15 sekunt saklamaly. Gözüňizi ýumanyňyzda, garaňkylygy duýmaly.

► Kelläňizi gymyldatmazdan, gözüňizi ýokary aşak, saga-çepe tarap hereketlendirmeli ýa-da sagdan ýokaryk, soňra çepden aşak, soň çepden ýokaryk, sagdan aşak gözüňiz bilen atanaklaýyn seretmeli. Şu hereketi 5 gezek gaýtalamaly.

► Şeýle hereketli maşkdan soňra gözüňize 5 sekunt dynç bermeli. Soňra gözüňizi giňden açyp, kelläňizi gymyldatmazdan, göni öňüňize seredip 10 — 15 sekunt gyrpmazdan saklamaly. Maşky 5 gezek gaýtalamaly.

► Ondan soňra, 1 minuta golaý kebelegiň ganat kakyşy ýaly gözüňizi yzygiderli gyrpyldatmaly.

► Her bir ýerine ýetirilýän maşkdan soňra gözüňize 10 sekunt dynç bermeli. Gözüňizi geometrik şekilleriň ugry boýunça hereketlendirmeli. Mysal üçin, gözüňizi hereket etdirmek bilen tegelek, gönüburçluk, dörtburçluk, altylyk san, ýyldyzjyk we beýleki figuralary ýasajak bolmaly.

► Jemleýji maşkda bolsa, gözüňize agram salmazdan, ýuwaşja ýumup, 10 sekunt saklamaly.

Mähriban KASYMOWA,
Myrat Garryýew adyndaky Türkmenistanyň Döwlet lukmançylyk uniwersitetiniň
Göz keselleri kafedrasynyň kliniki ordinatory.
"Zenan kalby" žurnaly, №8 - 2024