Bagban babanyň bellikleri
Günortanyň garaňkysynda pagta güpbüli gawunyň goluny gaýtarýan kakama haýpym gelip «Kaka...» diýdim welin: «Salkynda biýara ter bolýar. Sen gowusy bagdaky çatma baryp, mis tüňçäni oda goý-da, bagbanyň bellik depderini oka! Belki peýdalanarsyň» diýdi. Okadym. Ine, olardan käbiri:
At eýesini aýak sesinden, ekin eýesini aýak basyşyndan tanarmyş.
***
Nahal ese-boýa galýança igli çaga ideden ýaly. Ýetişensoň şol bagyň kölegesi özge daragtlaryň saýasyndan salkyn hem sapaly.
***
Gepe gidip ajydäne erigi aýranyma baý, bir gynandym-a. Asyl, onuň kişdesi ýüregagyra, maňzy süýji kesele derman eken.
***
Garry baglar guransoňam olary odun edesiň gelenok. Belki, olar bol miwe getiren ýaş baglara direg,söýget bolar.
Ogultäç ANNAÝEWA,
Baýramaly etrabyndaky 23-nji orta mekdebiň mugallymy.
"Maru-şahu jahan" welaýat gazeti, 11.07.2024