Aýdym deý, ýalkym deý ýürege dolan,
Nagmadan beslenen güýzüň şuglasy.
Şahyrlaň ylhamly söýgüsin alan,
Gaýmadan bezelen güýzüň şuglasy.

Gijeleň salkyny janyňa şypa,
Gündizleň galkymy ýazlara wepa,
Şemal ýapraklary düşände gapa,
Duýgudan düzülen güýzüň şuglasy.

Ýapraklarda monjuk damja balkyldar,
Güneşden görklenen çöller salkynlar,
Altynsow tebigat, göýä, ýalpyldar,
Ýagyşa ezilen güýzüň şuglasy.

Säherde saz çalýar ýörän ýolumda,
Agaçlar hiňlenýär sagy-solumda,
Tylla ýapraklardan çemen golumda,
Söýgüden gezelen güýzüň şuglasy.

Şemal sypalaýar başym sämedip,
Manysyny tirýän kalba äňedip,
Göýä, inýän ýaly dünýä täzeden,
Göwne joş getiren güýzüň şuglasy.

* * *

Öten agşam gezdim deňiz kenaryn,
Dolan Aýa bakyp ýatladym ýarym.
Aý şöhlesin saçýar mawy deňize,
A men welin munda çekýärin zaryň.

Aýyrdym hyýalda asmanda Aýy,
Ol gojaman deňiz tümlüge sary
siňip gitdi, gözden ýitdi tolkunlar,
Hatda damjalaryn seçmedik ýaly.

Şol pursatda dünýäm galan deý demsiz,
Ýüregim seslendi: «Söýýärsiň çensiz!».
Gel, nusga alaly Aýly deňizden,
Sen-ä mensiz oňma, men bolsa sensiz.

Döwranguly ANNAGULYÝEW,
Balkanabat şäherindäki daşary ýurt dillerini
çuňlaşdyryp öwredýän ýöriteleşdirilen
2-nji orta mekdebiň mugallymy.
"Nesil" gazeti, 07.10.2023