Babagammar piriň emrinden dörän,
Türkmeniň jigeri-ýüregi dutar.
Tenekar owazy janlara ýaran,
Köňülleriň mähir-keremi dutar.

Jadyly senetde gudrat, keramat,
Toýlara ýaraşýan haýyr-sahawat.
Asyrlardan gelýän dowam-dowamat,
Her öýüň törüniň bezegi dutar.

Owazy ýaňlanyp bu gün çar ýanda,
Goşa tara diller bitip saýranda,
Diňlänleriň goýýar aklyn haýranda,
Bendiwan kalplaryň geregi dutar.

Her gün ir säherde oýarýar bizi,
Şadyýan mukamlaň şirin owazy.
Ol hoş owaz bagtyýarlygyň sazy,
Ýaňlandyrýar ýakyn-yragy dutar.

Ussatlaryň, ägirtleriň senedi,
Saýylýarsyň gurallaryň seresi.
Joşa gel-de, Jeýhun-Hazar arasy,
Wasp eýle Garaşsyz Diýary dutar.

Hojageldi KÖRHANOW,
Babadaýhan etrabyndaky 15-nji orta mekdebiň mugallymy.
"Mugallymlar gazeti" gazeti, 04.10.2023