Mähriban Watanym

Döwrümiň bagt aýdymy,
Ömrüme asal gatanym.
Ýüregmiň joşup aýdany,
Sensiň, mähriban Watanym!

Şatlykdan doly pursatlar,
Dessanlarym sen hakda,
Goşga öwrülen gursakda
Heňsiň, mähriban Watanym!

Mähir görünýär ýazlaňda,
Bagtymy gördüm tozlaňda,
Waspyň ederin sazlamda,
Sensiň, mähriban Watanym!

* * *

Ýaşlaryň sesi

Ýurt abadan, il bagtyýar döwri duýup ýaşanyňda,
Ula hormat, kiçä sylag gaýnaýandyr ýaş aňynda,
Sanly ulgam, tehnologiýa…açyş edýär ýaş alymlar,
Galkynyşly döwranymyz, döwür aýdym hem sazymyz,
Siziň bilen öňe barýas, Arkadagly Serdarymyz!

Baryn ýagşa ýorýan ilim, gelýär gowa ynanasy,
Misli Hazar tolkunlary duýgularmyň yramasy,
Gurultaýly, maslahatly bu gün Ýaşlar guramasy,
Nesilleriň taryh ýazýar, zer bilendir her babymyz,
Siziň bilen öňe barýas, Arkadagly Serdarymyz!

Ýurt ertesi, il ynamy, şu Watanyň baýdagy biz,
Sargytlarňyz ýörelgämiz, ylham berýär aýdanyňyz,
Şu Watanyň geljegidir utuşymyz, baýragymyz,
Asyrlara ýaň salýandyr dutar, gyjak hem tarymyz!
Siziň bilen öňe barýas, Arkadagly Serdarymyz!

Saparnepes ATABAÝEW,
Balkan welaýatynyň Balkanabat şäherindäki ýöriteleşdirilen
2-nji orta mekdebiň iňlis dili mugallymy.
"Watan" gazeti, 19.08.2023