Akhana
Göteriler göwün, durlanar serim,
Arkadagym atlananda Akhana.
Gözelligne tagzym eder bu Ýerem,
Arkadagym atlananda Akhana.

Bilbiller saýraşar baglarda kimin,
Arkadag Akhanda, diýýäs: «Aperin!».
Synlap guwanýarys, guwanýar Zemin,
Arkadagym atlananda Akhana.

Şabaz bedew seýkin basar, näz eder,
Her kişňände töweregin ýaz eder.
Dutarym, gyjagym şirin saz eder,
Arkadagym atlananda Akhana.

Dünýä haýran seniň ajap oýnuňa,
Zer şaý-sepler zynat berer boýnuňa,
Dowamatdyr bütin dünýäň toýuna,
Arkadagym atlananda Akhana.

Jylawyny alsa eger destine,
Seýkin-seýkin ýöräberer dessine,
Hakdan nur ýagmyşdyr Watan üstüne,
Arkadagym atlananda Akhana.


Bedewler
Şaýat size türkmenimiň taryhy,
Aslyny Ahaldan alan bedewler.
Gerçekleriň göwün şady, myrady,
Kyn günleri ýoldaş bolan bedewler.

Oguz hanyň, Göroglynyň ganaty,
Jelaleddin, Keýmir Serdaryň aty.
Ýyllar sizi ençe-ençe synady,
Asyrlardan aşyp gelen, bedewler.

Dal bedewler ganat ýaýar, çapylar,
Şanyna şan goşjak ärler tapylar,
Ýeňişlerne dürli serpaý ýapylar,
Dowamaty dowam bolan bedewler.

Watanymda şanly toýlar toýlanýar,
Şol toýlarda çyn bedewler saýlanýar,
Buýsançly adyňyz dünýä aýlanýar,
Ylham bolup, kalba dolan, bedewler.

Hany ÇARYÝEW,
Balkan welaýatynyň Magtymguly etrabynyň
Tagan Berdiýew adyndaky
12-nji orta mekdebiniň mugallymy.
"Edebiýat we sungat" gazeti, 22.03.2024