Nowruz geldi, jümle-jahan alaýaz,
Köňül howalanyp uçasyň gelýär.
Bahar çabgasyndan pürepür dolan,
Keýigokaradan içesiň gelýär.

Ak güllere bürenipdir erikler,
Pyntyk ýardy nar agajy, igdeler.
Juwan ýürek gazal-goşgy joşanda,
Goja göwün bu nowruzda ýigdeler.

Gijäniň çygyna ezip zülplerin,
Leýlisaçlar dakynypdyr hünjüsin.
Gujagynda goşa gumry ornaşyp,
Birenaýy saýraşýarlar ünjüsiz.

Öten agşam gözýetimde gizlenen,
Günüň dogşy ne ajaýyp, owadan.
Bilbilleň owazy sermest eýlese,
Gülüň ysy gelýär sergin howadan.

Belent daglar geýse zerbap donuny,
Sähra bu gün has-da gözel görünýär.
Bahar pasly tebigatyň keşbi hem,
Çeşme-bulaklar deý barha durlanýar.

Çerkez ESENOW,
Balkanabat şäherindäki daşary ýurt dillerine ýöriteleşdirilen
3-nji orta mekdebiň mugallymy.
Türkmenistanyň Hormatly il ýaşulusy.
"Mugallymlar gazeti" gazeti, 20.03.2024