Türkmenimiň milli edim-gylymny,
Özünde jem eýläp, geldi Nowruzym.
Görkünden görk alyp, gyz-u-gelniniň,
Äleme nur paýlap geldi Nowruzym.

Agaçlar pyntyklap, ýaşardy ýene,
Nahallar ekilip, kök urýar ýere.
Gülzara beslenip dag-u-düz, dere,
Keşdesini gaýmap geldi Nowruzym.

Gyzlar monjugatdy aýdyşar munda,
Her kime bir reňkden paý düşer munda.
Dürli-dürli tagam, baý, bişer munda,
Semenisi gaýnap geldi Nowruzym.

Ýere ýagmyr guýup, kalplara joşgun,
Güller tansa düşer, ýaýradyp müşgün.
Älemgoşar saçar müňbir öwüşgin,
Gökde bulut oýnap geldi Nowruzym.

Ýere ýyly girip, tebigata jan,
Daýhan gaýratyna galýar ýaňadan.
Berekedin bol eçiler bu meýdan,
Ýaz toýuny toýlap geldi Nowruzym.

Mähri SAPARMEDOWA,
Boldumsaz etrabyndaky 69-njy orta mekdebiň mugallymy,
Türkmenistanyň Ýaşlar baýragynyň eýesi.
"Mugallymlar gazeti" gazeti, 20.03.2024