Döwletli-döwranly ýurda
Bahar geldi — ýazym geldi.
Watanymda orny törde,
Bahar geldi — ýazym geldi.

Ýatladyp Burkut babany,
Guýdy öýlänçi çabgany,
Ähli pasyllaň soltany,
Bahar geldi — ýazym geldi.

Gör, gökde ýyldyrym çakdy.
Ýagyşdan soň Güneş çykdy.
Älemgoşar gülüp bakdy,
Bahar geldi — ýazym geldi.

Babadaýhan batyp dere,
Tohum taşlar ene ýere,
Hasyl öner, döner zere,
Bahar geldi — ýazym geldi.

Sähra bezeg ak kömelek,
Gondy güle gök kebelek,
Goşgy joşdy şahyr ýürek,
Bahar geldi — ýazym geldi

Orazmyrat REJEBOW,
Tejen etrabyndaky 21-nji orta mekdebiň mugallymy.
"Mugallymlar gazeti" gazeti, 06.03.2024