Aýdym aýtmaz şemallar,
Sen bolmasaň ýanymda.
Bilbil saýramaz, aglar,
Sen bolmasaň ýanymda.

Salan ýaraň zorugyp,
Parh etmän sag-solumy,
Ýitirerin ýolumy,
Sen bolmasaň ýanymda.

Bolmaz ysgyn-mydar-da,
Hasrat beren pidaň-da.
Dert agyr bor çydardan,
Sen bolmasaň ýanymda.

Ýa açylmaz gulpmy sen?
Ýagmazak bulutmy sen?
Şatlygy unutmyşam,
Sen bolmasaň ýanymda.

Bagyma bilbil gonmaz,
Dünýe meň bilen oňmaz,
Bagtym ýanymda bolmaz,
Sen bolmasaň ýanymda.


GÖWNÜM

Ýatlamaga puryja ýok bu günler,
Hallar ýagşymydyr, barmysyň, göwnüm?
Bilýän, çözülmedi galan düwünler,
Ýa halys dertdeşe zarmysyň, göwnüm?

Namart elin silkip geplän mahaly,
Unutmansyň mähriň kemen bahary.
Çagakam ykbalyň çetlän mahaly,
Gözýaşly gursakda barmydyň, göwnüm?

Tebigatdan gorkman, dilden basylýas,
Seret, illeň kalbyndaky pasyrda.
Oýnap-gülünmeli çärýek asyr ýaş
Galam aglatmaly çagmydyr, göwnüm?

Gamgyn bolduň, Aý şuglasy goýalsa,
Ajy hasratlar mydarsyz goýanda.
Nämä tans edipdiň ýaryň toýunda,
Aýdymmydy ýa-da sazmydyr, göwnüm?

Ýol galmady söwer ýara barara,
Soňlandy dünýämde şowhun, dabara.
Şam boldy gawunyň gowsy şagala,
Ol dildaryň bilen ýarlydyr, göwnüm.

Takdyry ýeňeris çykarsa hokga,
Çykar gursagyňdan atylan oklar.
Sende ýöne ýerden harasat gopmaz,
Arkaň sabyr atly daglydyr, göwnüm.


GEL!

Dert alawy tutaşmanka,
Yşkyň ody sönmänkä gel.
Gammazlara sataşmankam,
Kalpda güman dömmänkä gel.

Bizden uçan bagt guşy
Ketegine sümmänkä gel.
Altyn balyk üç dilegmiz
Inkär edip, çümmänkä gel.

Ýekeligme için tutup,
Içýakgyçlar gülmänkä gel.
Hasratlarym ýaka ýyrtyp,
Hatarlanyp gelmänkä gel.

Umytlarmyň közi öçüp,
Ýüregime gömmänkäm gel.
Bu dünýeden ýygnap göçüm,
Soňky haýyş, gitmänkäm gel.

Nazar HANMEDOW,
Görogly etrabyndaky 27-nji orta mekdebiň mugallymy.
"Nesil" gazeti, 13.01.2024