Çykyp dagyň depesine,
Asmana elim ýetirsem.
Jöwzada yssylan wagtym,
Deňziň ak ýelin getirsem.

Teşne gulagy gandyrjak,
Dutaryň heňin getirsem.
Gyş küýsäp gülli sährany,
Sähranyň gülün getirsem.

Göwnüm halys joşan çagy,
Baharyň demin getirsem.
Kem zadyň dolup üstüni,
Dolynyň kemin ýetirsem.


Täsinlik

Öz ilimiň söwüdinde paýym bar,
Başyn aşak egip durşy birgeňsi.
Öz ilimiň guwlarynda taýym bar,
Ýerinde oturyp-turşy birgeňsi.

Öz ilimiň buludynda paýym bar,
Saçym sypap-sypap ezşi birgeňsi.
Öz ilimiň durnasynda taýym bar,
Dünýäni aýlanyp gezşi birgeňsi.


Gyş

Sowuk ýapraklara damja düşüpdir,
Buldurap otyr ol, dür dänesi dek.
Dek düýnem ýokdy ol, ýaňja düşüpdir,
Hem gözden uçmagy islänok entek.

Sowuk ýapraklara damja düşüpdir,
Ol bir ümrüň boýna atan hünjüsi.
Hem daň çigregine üşän ýapraklaň,
Göwnüniň törüne çöken ünjüsi.

Şirinjemal ÝEGELEKOWA,
Aşgabat şäherindäki tebigy ugurly derslere ýöriteleşdirilen
44-nji orta mekdebiň ýokary derejeli mugallymy,
Aşgabat şäher Halk Maslahatynyň agzasy.
"Aşgabat" gazeti, 04.01.2024