Täze ýyl golaýlaberse, biziň her birimiz öz ýakyn dost-ýarlarymyza, dogan-garyndaşlarymyza, mähriban ynsanlara iň süýji arzuw-isleglerimizi, ýürek sözlerimizi aýtmaga howlugýarys. Şeýle bolansoň, biz ýörite Täze ýyl «SMS»-lerini taýýarlap, size ýetirmegi makul bildik. Bu «SMS»-ler siziň ýakyn hossarlaryňyz üçin garaşylmadyk sowgat bolar.

«Ähli reňkleriň bir ýere jemlenip, owadan älemgoşary emele getirişi ýaly, garşy aljak her bir günüňiz, sagadyňyz hem siziň dünýäňize täze reňk çaýyp, köňül asmanyňyzda täsin bir älemgoşary döretsin! Täze ýyl ähli umyt-arzuwlaryňyza öwüşgin bersin!».

* * *

«Ýaşyl öwsüp duran gozadan ap-ak pagtanyň lowurdap çykyşy ýaly, siziň gyzgyn ýüregiňizden çykan ak arzuwlaryňyz, tämiz islegleriňiz hem dünýäňize aklyk bolup ornasyn. Täze ýyl ähli arzuw-islegleriňiziň hasyl bolmagyna ýol açsyn!».

* * *

«Aýazbabanyň haltasyndaky ähli sowgatlaryň siziňki bolmagyny däl-de, size şatlyk paýlaýan Aýazbabanyň tämiz ýüregi ýaly ýürekli, päkize kalply ynsanlaryň daş-töweregiňizi gurşap almagyny arzuw edýärin. Täze ýyl size täze dostlary, ýakymly tanyşlyklary sowgat etsin!».

* * *

«Ak ertirlere uzan ýollaryňyz ýolyşyksyz, bagt ýagmyrynyň astynda elleriňiz saýawansyz, ýolmak islän elwan gülleriňiz tikensiz bolsun! Täze ýylyňyz gutly bolsun!».

* * *

«Her ýylyň ak garly gyşda tamamlanyp, ýene-de şol ak nura beslenen gyşda başlanýandygyna üns berdiňizmi?! Ak arzuwlar bilen başlanjak Täze ýyl siziň tämiz ýürek arzuwlaryňyzy hasyl etmän tamamlanmasyn. Täze ýylyňyz düşümli bolsun!».

* * *

«Ýekeje şänikden bir uly daragt döreýär. Kalbyňyzda dörän ýekeje umyt hem siziň uly bagtyň eýesi bolmagyňyza sebäp bolsun!».

* * *

«Gülmek» sözi «gül» sözünden dörän bolmaly, ýürekden gülen ynsanyň güllere çalym etmegi-de, megerem, şondan bolsa gerek. Hemişe güler ýüzüňizde gülki gülleri açylyp, ýüreklere şatlyk uçgunjyklaryny paýlap dursun!».

* * *

«Täze ýyl feýerwerkleriniň garaňky, tüm gijäni ýagtyldyp, asmana bezeg berşi ýaly, ýüregiňizde beslän umyt-arzuwlaryňyz hem köňülleriňize yşyk saçyp, ömrüňizi ýagtylyga beslesin! Täze ýyl ykballaryňyza nur bolup siňsin!».

Goçmyrat ORAZBERDIÝEW,
«Güneş».
"Güneş" žurnaly, №12-2023