Äýnek dakyp gözüne,
Nazaryny aýlady.
Okuwçylaň içinden
Ýene birin saýlady.

Çagyrdy okuwçyny
Synp tagtanyň ýanyna.
Beýlekiler pyşyrdaşýar
Onuň düşen halyna.

Okuwçy sakynjyrap
Aýdyp bilmän temany.
Ödemedi bu gezegem
Bildirilen tamany.

Äýnegini aýyrdy
Mugallym çytdy gaşyn.
Okuwça nazar saldy,
Ýaýkady agras başyn.

Emma hiç zat diýmedi
Geçirdi ony ýerne.
Bir azajyk wagt berdi,
Öý işini ederne.

Aýjahan ANNABAÝEWA,
«Dünýä edebiýaty» žurnalynyň bölüm redaktory.
"Güneş" žurnaly, №12-2023