Şahyra

Kämillikden dörän dünýä,
Dana Pyragyň paýhasy.
Mukaddeslige deňelýär,
Dana Pyragyň paýhasy.

Köňülleriň ybadaty,
Edebiýatyň keramaty,
Dünýäň ruhy dowamaty,
Dana Pyragyň paýhasy.

Nur-imanyň aýnasydyr,
Güllän ylham ýaýlasydyr,
Köňülleriň namasydyr,
Dana Pyragyň paýhasy.

Söz mülküniň hazynasy,
Parasatyň hakydasy,
Eýýamlaryň hakykaty,
Dana Pyragyň paýhasy.

Galkynyşly döwre joşgun,
Göterdi ömürleň yşkyn,
Nurlandyrýar dünýäň keşbin,
Dana Pyragyň paýhasy.


Söz mülküniň bossany (Nezire)

Tagzym edýär ruhuna türkmen halkynyň bary,
«Pähim-paýhas ummany Magtymguly Pyragy».
Her setiri, her beýdi, her bendi köňül tary,
Uly dünýäň diwany Magtymguly Pyragy.

Eýýamlaryň, heňňamlaň keramatly perzendi,
Ezelden edebinde erenleň peder pendi,
Çoh garaşyp, arzuwlan ajap eýýamyň geldi,
Söz mülküniň bossany Magtymguly Pyragy.

«Reňbe-reň gül açyldy, bu gün ýaşyl ýaýlalar»,
Şöhratyň asyrlara, nesillere aýlanar.
Dür setirleň dünýäniň ýüreginde ýaňlanar,
Şygrystanyň dessany Magtymguly Pyragy.

Bu berkarar döwletli türkmeniň sözlär tili,
Bu bagtyýar milletli Watanyň solmaz güli,
Şanly toýa besleýäs şöhratly 300 ýyly,
«Pähim-paýhas ummany Magtymguly Pyragy».


Aýjemal GAÝLYÝEWA,
Balkanabat şäheriniň daşary ýurt
dillerini çuňlaşdyryp öwredýän
umumybilim berýän ýöriteleşdirilen
2-nji orta mekdebiniň mugallymy.


* * *

Pyragynyň şygyrlary

Çyn şägirde juda zerur,
Pyragynyň şygyrlary.
Ömre şugla, kalbyňa nur,
Pyragynyň şygyrlary.

Nazar kylsaň sagu-sola,
Ugrukdyrar dogry ýola,
Beslär päk arzuw-hyýala,
Pyragynyň şygyrlary.

Jan biýr goşgy-gazalyňa,
Şan biýr bagşy-ozanyňa,
Alaw — ylham gazanyňa,
Pyragynyň şygyrlary.

Islär saňa gowulygy,
Dogrulygy, şowlulygy,
Hem ündär ýagşy gylygy,
Pyragynyň şygyrlary.

Öwrenmekden etme heder,
Ynsanlygy beýan eder,
Nakyla öwrülip giden
Pyragynyň şygyrlary.

Kämilligiň bolmaz çeni,
Aýan eder ýalan-çyny.
Şygryýetiň dür çemeni,
Pyragynyň şygyrlary.

Mähri SAPARMEDOWA,
Boldumsaz etrabyndaky 69-njy orta mekdebiň mugallymy.
"Edebiýat we sungat" gazeti, 08.12.2023