Kän garaşdym bu tyllaýy güýzlere,
Ýene geldim şol öňküje ýerime.
Asuda öwüsýän güýzüň şemaly
Şirin mukam serpaý edýär serime.

Göýä Ezizowyň goşgusy deýin,
Gözel öýmesini atynan Zemin.
Ak patasyn alan geline meňzäp,
Edep-eda bilen alyp dur demin.

Agaçlaryň zerbap zülpün sypalap,
Her saba öwüsýär mylaýym şemal.
Gözýetime siňip giden nazarlaň
Huzuryna çagyrýar meni kämahal.

Altyn güýzüň mukamyny tebigat
Serpaý eder ýaýlalara, düzlere.
Ömürlik maýyl men, aňk etdiň meni,
Kän garaşdym bu tyllaýy güýzlere.

Gülnara JORAÝEWA,
Dänew etrabyndaky 26-njy orta mekdebiň mugallymy.
"Türkmen gündogary" welaýat gazeti, 22.11.2023