Pyragym, sensiň!

Etrek, Gerkez, Hajygowşan, Gürgende,
Agyr syýahatda, agyr kerwende,
Jebirden, zulumdan doly günlerde,
Taňrynyň gorany, Pyragym, sensiň!

Ýigidiň hyýaly döräp serinde,
Çykyp bilmän, çöküp galsa garynda,
Kelebiniň ujy ýiten ýerinde,
Maňlaýyn diräni, Pyragym, sensiň!

Gylyç däl-de, paýhas ýaragy bilen,
Okdan ýiti şygyr-gazaly bilen,
Öz ilini pähim nazary bilen,
Goran kalp soltany, Pyragym, sensiň!

Ýanyp-köýüp söwer ýaryň ugrunda,
Yşk derdinden ýalyn döräp bagrynda,
Waspyny ýazypdyr ýüzläp şygrynda,
Meňliniň halany, Pyragym, sensiň!

Her bir sözi göwher, dürüň dänesi,
Paýhasyň öýjügi, yklym danasy,
Şygyr ummanynyň akyl gämisi,
Älemiň sylany, Pyragym, sensiň!

Garaşsyz Watanda okap kitabyn,
Waraklap her sahypasyn, her babyn,
Arkadagyň, Arkadagly Serdaryň,
Sarpalap-sylany, Pyragym, sensiň!


Gudrat

Okadym Pyragyň bir goşgusyny,
Ussada kalbymyň söýgüsi bilen.
Köp many eçildi syrly setirler,
Pähim-paýhas siňen duýgusy bilen.

Ruhum täzelenip, okadym ýene,
Şol goşgyny höwes bilen gaýtalap.
Ýene şol setirler eçildi maňa,
Öňki alan täsirimden başgarak.

Gözlerim açylyp, kalbym giňelip,
Şol goşgyny ýaňadandan okadym.
Ýene täze pikirlere duş geldim,
Okap gutaramsoň, goýup nokadyn.

Gudrat gördüm okap beýik şahyry,
Kerem-keramata kändir şükürim!
Her gezek okamda şol bir goşgyny,
Üstünden barýaryn täze pikiriň.

Şygyr şalygynyň beýik soltany,
Özgerdýär ynsany, özgerdýär aňy.
Irkgin guýy kimin çogup dur mydam,
Her setir her gezek täze bir many.

Rejepguly Amangeldiýew,
Esenguly etrabyndaky 10-njy orta mekdebiň mugallymy.
"Balkan" welaýat gazeti, 02.11.2023