Müşki-anbar ysly gülli ýaz bilen,
Müň dürli öwüşgin, hoş owaz bilen,
Barçalara oýanmagy saz bilen,
Atyp gelýän daň aýtdymy, perwana?

Göçdüň-gonduň gujagynda baglygyň,
Ýaýnadyň goýnunda lälezarlygyň,
Näzikligiň muhabbete zarlygyn,
Ýel aýtdymy, Gün aýtdymy, perwana?

«Her gülüň öz ysy bar» diýleni,
Yşkyň ataşynda ýanyp, köýmegi,
Gözellige teşneligi söýmegi,
Bilbilmi ýa gül aýtdymy, perwana?

Säher çagy gülden-güle gonmagy,
Gözel dünýäň gözlerinden ganmagy,
Agşam yşk-u-ataşlarda ýanmagy,
Sessiz-üýnsüz sen aýtdyňmy, perwana?!

Allamyrat SAZAKOW,
Saparmyrat Türkmenbaşy etrabyndaky
84-nji orta mekdebiň mugallymy.
"Daşoguz habarlary" welaýat gazeti, 02.11.2023