Ene söýgüsi

Dünýäde belent zat ýokdur,
Ene söýgüsinden başga.
Ynjan göwün aram tapar,
Nazar salsaň mährem keşbe.

Täsin duýgy kalba dolar,
Hakyň nury bar ýüzünde.
Müşgil işler aňsat bolar,
Kerem bardyr her sözünde.

Ha kiçi bol, ha uly bol,
Parhy ýokdur ýaşyň saňa.
Çala baş syzlasa eger,
Zyban «Eje» diýer diňe.

Razy etmek parzyň, balam,
Käbäňdir ol, goragyňdyr.
Barlygynda arzymanyň,
Ýoklugynda soragyňdyr...


Eneleriň barlygy

Gözellikleriň bary,
Jemlenipdir zenanda.
Olar didarlaň nury,
Bu bagtyýar zamanda.

Mukaddesdir, ezizdir,
Ady dillere sena.
Eneleriň barlygy
Baky bagtyňa güwä.

Söýüň olary barka,
Bagra basyň, guwanyň!
Belent buýsançdyr bilseň
Enä başyň egeniň.

Şatlyk JEPBAROW,
Murgap etrabyndaky 3-nji orta mekdebiň mugallymy.
"Ahal durmuşy" welaýat gazeti, 19.02.2025