Bu durmuşda gol berseňiz kitaba,
Dünýäň syry kitap bilen açylýar.
Sözleri dür, parasady akaba,
Dünýäň syry kitap bilen açylýar.

Ula hormat, kiçä gadyr goýmagy,
Öwreder ol Watanyňy söýmegi,
Heňňam içre parasadyň gaýmagy,
Dünýäň syry kitap bilen açylýar.

Ýol görkezer, eger diňleseň böwrüň,
Oka, many bilen nagyşlar ömrüň,
Sazlar kalp duýgusyn, akylyň emrin,
Dünýäň syry kitap bilen açylýar.

Kitap oka, barha giňär gözýetim,
Aklyň durlar, päklär päliň, niýetiň,
Eziz ömrüň iň arzyly lezzeti —–
Dünýäň syry kitap bilen açylýar.

Mähri ALLABERGENOWA,
Şabat etrabyndaky 50-nji orta mekdebiň kitaphanaçysy.
"Daşoguz habarlary" welaýat gazeti, 13.02.2025