Hoş bolsaň

Ata göwnüň joş bolar,
Ogul-gyzdan hoş bolsaň,
Goja göwnüň ýaş bolar,
Ogul-gyzdan hoş bolsaň.

Rahatlanar ýüregiň,
Artar doga-dilegiň,
Agzybirlik diregiň,
Ogul-gyzdan hoş bolsaň.

Gadyr goýar il saňa,
Ýakyn bolar ýol saňa,
Işiň ilerlär öňe,
Ogul-gyzdan hoş bolsaň.

Öýde ene şat bolar,
Gaýgy-hasrat ýat bolar.
Ojaga döwlet dolar,
Ogul-gyzdan hoş bolsaň.


Adamlaryň arasynda

Aman-esen gezip ýörsem,
Adamlaryň arasynda.
Ile-güne haýyr bersem,
Adamlaryň arasynda.

Dostlaryma açyp gujak,
Ýazsam bereketli saçak,
Söhbet etsek ajap-ajap,
Adamlaryň arasynda.

Gam-gussadan bolup daşda,
Ylham joşsa her bir ýaşda,
Gezsem alkyş eşde-eşde,
Adamlaryň arasynda.

Watany, ilimi söýýän,
Atalaň pendine uýýan,
Şygyrlamdan çemen goýýan,
Adamlaryň arasynda.

Orazmyrat REJEBOW,
Tejen etrabyndaky 21-nji orta mekdebiň mugallymy.
"Ahal durmuşy" welaýat gazeti, 26.02.2025