Türkmeniň

Peder pentlerine goýulyp sarpa,
Döwletler gurlupdyr arkama-arka,
Sahawatlyk paýlap il-güne, halka,
Dowamaty dowamatdyr türkmeniň.

Taryhynda bardyr ärler, nijeler,
Hikmeti doga dek pirler, hojalar,
Nesillerniň kalby şondan ynjalar,
Olar ruhy daýanjydyr türkmeniň.

Ylhamy owaldan gursagna guýlan,
Şoň üçinem «Hakdan içen» diýilen,
Geçmişi, geljegi şygrynda ýugran,
Akyldary Pyragydyr türkmeniň.

Bahry-Hazar, Jeýhun, Ürgenç, Dehistan...
Bu ýurduň waspyna az bolar dessan,
Bereketli toprak, asuda asman,
Jennet dek Diýary bardyr türkmeniň.

Täze döwür, täze eýýam döreden,
Şanymyzy bütin dünýä jar eden,
Arkadagly Serdar yzyn ýöreden,
Baş buýsanjy Arkadagdyr türkmeniň.


Hazarym

Mahal-mahal Hazaryň göge galýar tolkuny,
Balykçylar gorkanok, çünki olar arkaly,
Bereketli torlary takgaz, çapak, bekreli,
Şorja balyk lezzeti, bu eşretdir, Hazarym.

Mawy deňzim — giň çanak, asman — onuň gapagy,
Çarlaklaň ak peri dek tolkunlaň ak köpügi,
Myhmanparaz Awazaň elwan-elwan şapagy,
Düşüp durka kenara, bu jennetdir, Hazarym.

Guşlaryň şirin sesi — bu kenaryň mukamy,
Bol suwuň üsti-asty — berekediň mekany,
Myhman barsa diýerler: «Geliň-geçiň, bakaly!»
Bizde myhmansöýerlik nusgalykdyr, Hazarym.

Hanha, gelýär ýaýkanşyp agyr ýükli gämiler,
Olar gelip ajaýyp kenaryňda säginer,
Pederlermiz aýdypdyr: «Aý dogsa, älem görer»,
Ýüpek ýoluň dowamy üstüňdendir, Hazarym.

Otyr dagy gujaklap şäherim Türkmenbaşy,
Baýdagym dur pasyrdap, sag-aman degre-daşy,
Arkadagly Serdaryň uzasyn ömür-ýaşy,
Kalby buýsançly iliň bagtyýardyr, Hazarym.

Rejepdurdy HAKJANOW,
Bereket etrabyndaky 12-nji orta mekdebiň mugallymy.


Ata-enäniň dilegi

Galdyrýandyr çöken bagty,
Ata-enäniň dilegi.
Ýoluňa çyragdyr ýagty,
Ata-enäniň dilegi.

Kalbyňy tämizlär, ýuwar,
Gelen-geljek howpy kowar,
Bela-beterlerden sowar,
Ata-enäniň dilegi.

Bolsa eger çözer düwni,
Gaharlynyň ýazar towny,
Tukatlansaň, açar göwni,
Ata-enäniň dilegi.

Alga almazlyk hebesdir,
Gelen derdi yza tesdir,
Keramatdyr, mukaddesdir,
Ata-enäniň dilegi.


Ylhamdarym

Barsam meniň göwnüm joşýar,
Ylhamdarym — dogduk depäm.
Saňa dessanlar ýaraşýar,
Ylhamdarym — dogduk depäm.

Galkyndyrýar bagşylaryň,
Bir-birinden ýagşylaryň,
Dogan ýaly goňşularym,
Ylhamdarym — dogduk depäm.

Miweleriňden dadanlar,
Geň galar iýen adamlar,
Zeýtun, nar, injir, badamlar,
Ylhamdarym — dogduk depäm.

Seni küýseýär ýüregim,
Gije-gündiz sen soragym,
Dilegim hem-de geregim,
Ylhamdarym — dogduk depäm.

Täçmämmet GURBANMÄMMEDOW,
Türkmenbaşy etrabynyň Guwlymaýak şäherçesindäki
7-nji orta mekdebiň müdiri.


Oýnasyn

Elleriňde ýaz bolup,
Elwan güller oýnasyn.
Ykbalyňa ýar bolup,
Süýji günler oýnasyn.

Bu owadan jahanda,
Taýyň tapsaň haçan-da,
Gürläp agzyň açaňda,
Asal-ballar oýnasyn.

Ykbalyň pursat berse,
Ýalynly gursak berse,
Söýmäge rugsat berse,
Elde eller oýnasyn.

Yşk baglasa erkiňi,
Aý synlasa görküňi,
Darap-darap zülpüňi,
Saba ýeller oýnasyn.

Hyjuwlaryň däliräp,
Gelse kalby täzeläp,
Lebleriňde çabyrap,
Gyzgyn demler oýnasyn.

Ataş döräp bagrymda,
Derdim aýtsam şygrymda,
Menden başga ugruňda,
Aýt, gyz, kimler oýnasyn?!

Rejepguly AMANGELDIÝEW,
Esenguly etrabyndaky 10-njy orta mekdebiň mugallymy.


"Balkan" welaýat gazeti, 07.11.2024