Gujurdan, gurbatdan, dogumdan aslyň,
Ýeňişlere ýaran kowumdan aslyň,
Aýdymda, öýdümde buýsançly waspyň,
Guwanjymyz — sen, wepaly Alabaý!

Duýgur sen, algyr sen, batyrlyk başda,
Syrdaş sen, ýoldaş sen, duruşyň başga,
Yhlasyň, ynamyň, dogumyň nusga,
Buýsanjymyz — sen, wepaly Alabaý!

Taryhyň, tarypyň döwürler aşa,
Keşbiňe, kesbiňe göwünler joşa,
Görküň, örküň şugla tylla kuýaşa,
Söýünjimiz — sen, wepaly Alabaý!

Gaýduwsyzlyk, gaýratlylyk ömrüňde,
Aslyňa, waspyňa dessan köňülde,
Adyňa, şanyňa toýlar döwürde,
Dür-genjimiz — sen, wepaly Alabaý!

Aýjemal GAÝLYÝEWA,
S.A.Nyýazow adyndaky Türkmen oba hojalyk
uniwersitetiniň mugallymy.
"Türkmen dünýäsi" gazeti, 23.10.2024