Gözel ýurdumda bu gün —
Ilkinji jaň kakylýar.
Göge göterlip göwün,
Ilkinji jaň kakylýar.

Güýzüň ilkinji Güni,
Böwsüp çykanda tüni,
Açylyp göwün güli,
Ilkinji jaň kakylýar.

Ýaşlygymyň sesimi?!
Kalbymyň höwesimi?!
Artdyryp höwesimi —
Ilkinji jaň kakylýar.

Tanyş oglanlar-gyzlar —
Kalbymda galan yzlar.
Gaýtalanyp bu güýzler,
Ilkinji jaň kakylýar.

Geçmiş ýitip salgymda,
Geljegiň dur alnyňda.
Hemmeleriň kalbynda,
Ilkinji jaň kakylýar.

Armana gözlemän peý,
Söý, bu geň dünýäni söý!
Elli ýyl ozalky deý,
Ilkinji jaň kakylýar.

Işigin açyp ylmyň,
Gowlanar edim-gylmyň.
Pyşyrdaýar mugallym:
«Ilkinji jaň kakylýar».

Wagt — akyp duran ab,
Akyp dur, bizi synap.
Geçen ýyllary sanap,
Ilkinji jaň kakylýar.

Aýyt GURBANOW,
Akdepe etrabyndaky 91-nji orta mekdebiň mugallymy.
"Daşoguz habarlary" welaýat gazeti, 29.08.2024