Her gün ataň diňlär ýaly,
Derdi biraz ýeňlär ýaly,
Ýuka göwni giňär ýaly,
Oka, oglum, Pyragyny!

Ýumşa giden eglenýändir,
Yhlas, hyjuw güýçlenýändir.
Bize kuwwat-güýç berýändir,
Oka, oglum, Pyragyny!

Syrly pikir geň bolýandyr,
Ilde dana diňlenýändir,
Her gün işiň oň bolýandyr,
Oka, oglum, Pyragyny!

Suw gözleýär ýeriň pesin,
Ejiz görseň eselmegin,
Namart görseň peselmegin,
Oka, oglum, Pyragyny!

Keramatdyr Watan duzy,
Ýurda şandyr ogul-gyzy,
Dowamlydyr peder yzy,
Oka, oglum, Pyragyny!

Hudaýguly GOÇOW,
Kerki etrabyndaky 25-nji orta mekdebiň mugallymy.
"Güneş" žurnaly, №8 - 2024