Gözelleriň duýgusy deý ajaýyp,
Milli mirasymyz — türkmen halysy.
Ýüregiň joşdurar, kalba nur çaýyp,
Milli mirasymyz — türkmen halysy.

Heňňamlarda sünnälenen sungatdyr,
Eneleriň mähri siňen suratdyr.
Nepis barmaklardan dörän gudratdyr,
Milli mirasymyz — türkmen halysy.

Zehinlerden ajap eser dogupdyr,
Ýürekden syzylyp, kalba siňip dur,
Göllerinde mukam joşup, çogup dur,
Milli mirasymyz — türkmen halysy.

Türkmeniň dag-düzi, deşti bar sende,
Dana aryplaryň keşbi bar sende,
Zenan dünýäsiniň köşgi bar sende,
Milli mirasymyz — türkmen halysy.

«Arşyň nepisligi», «Janly rowaýat»,
Arkadagdan türkmen halkyna sowgat,
Şöhratly taryha — geçmişe şaýat,
Milli mirasymyz — türkmen halysy.

Çerkez ESENOW,
Balkanabat şäherindäki daşary ýurt dillerine ýöriteleşdirilen
3-nji orta mekdebiň mugallymy,
Türkmenistanyň Hormatly il ýaşulusy.
"Mugallymlar gazeti" gazeti, 22.05.2024